hayat waqf-e-gham-e-rozgar kyun karte

hayāt vaqf-e-ġham-e-rozgār kyuuñ karte

maiñ sochtā huuñ ki vo mujh se pyaar kyuuñ karte

na merī raah meñ taare na mere paas charāġh

vo mere saath safar iḳhtiyār kyuuñ karte

nigāh sirf bulāvā nahīñ kuchh aur bhī hai

ye jānte to tirā e'tibār kyuuñ karte

ġham-e-hayāt meñ hotā agar na haath tirā

to ham ḳhirad meñ junūñ ko shumār kyuuñ karte

koī to baat hai varna jafāoñ ke maare

tujhe bhulā ke tirā intizār kyuuñ karte

'nazar' chaman meñ agar vāqa.ī bahār aatī

to phuul ḳhvāhish-e-abr-e-bahār kyuuñ karte

hayat waqf-e-gham-e-rozgar kyun karte

main sochta hun ki wo mujh se pyar kyun karte

na meri rah mein tare na mere pas charagh

wo mere sath safar iKHtiyar kyun karte

nigah sirf bulawa nahin kuchh aur bhi hai

ye jaante to tera e'tibar kyun karte

gham-e-hayat mein hota agar na hath tera

to hum KHirad mein junun ko shumar kyun karte

koi to baat hai warna jafaon ke mare

tujhe bhula ke tera intizar kyun karte

'nazar' chaman mein agar waqai bahaar aati

to phul KHwahish-e-abr-e-bahaar kyun karte