hazar gardish-e-sham-o-sahar se guzre hain

hazār gardish-e-shām-o-sahar se guzre haiñ

vo qāfile jo tirī rahguzar se guzre haiñ

abhī havas ko mayassar nahīñ diloñ kā gudāz

abhī ye log maqām-e-nazar se guzre haiñ

har ek naqsh pe thā tere naqsh-e-pā kā gumāñ

qadam qadam pe tirī rahguzar se guzre haiñ

na jaane kaun sī manzil pe jā ke ruk jaa.eñ

nazar ke qāfile dīvār-o-dar se guzre haiñ

rahīl-e-shauq se larzāñ thā zindagī kā shu'ūr

na jaane kis liye ham be-ḳhabar se guzre haiñ

kuchh aur phail ga.iiñ dard kī kaThin rāheñ

ġham-e-firāq ke maare jidhar se guzre haiñ

jahāñ surūr mayassar thā jaam o mai ke baġhair

vo mai-kade bhī hamārī nazar se guzre haiñ

hazar gardish-e-sham-o-sahar se guzre hain

wo qafile jo teri rahguzar se guzre hain

abhi hawas ko mayassar nahin dilon ka gudaz

abhi ye log maqam-e-nazar se guzre hain

har ek naqsh pe tha tere naqsh-e-pa ka guman

qadam qadam pe teri rahguzar se guzre hain

na jaane kaun si manzil pe ja ke ruk jaen

nazar ke qafile diwar-o-dar se guzre hain

rahil-e-shauq se larzan tha zindagi ka shu'ur

na jaane kis liye hum be-KHabar se guzre hain

kuchh aur phail gain dard ki kaThin rahen

gham-e-firaq ke mare jidhar se guzre hain

jahan surur mayassar tha jam o mai ke baghair

wo mai-kade bhi hamari nazar se guzre hain