hazar hum par sitam karenge hazar jaur-o-jafa karenge

hazār ham par sitam kareñge hazār jaur-o-jafā kareñge

na ham ne tark-e-vafā kiyā hai kabhī na tark-e-vafā kareñge

nahīñ haiñ āsāñ vafā kī rāheñ qadam qadam hai na.ī qayāmat

ḳhirad kahāñ apne kaam aa.ī junūñ ko ab rahnumā kareñge

na koī dushman bujhā sake haiñ na koī āñdhī bujhā sakegī

charāġh ulfat ke is jahāñ meñ jalā kiye haiñ jalā kareñge

yahī parastish hai ab hamārī yahī hai ab bandagī hamārī

jahāñ bhī hoñ zulf-o-ruḳh ke saa.e vahīñ pe sajde kyā kareñge

hai dushmanoñ se bhī pyaar ham ko ki dostī hai shi.ār apnā

bichhā.eñge raah meñ jo kāñTe ham un ke haq meñ duā kareñge

nahīñ ye aish-o-tarab kī mahfil maqām-e-jahd-o-amal hai duniyā

unhīñ ko jiine kā haq milegā jo ziist kā haq adā kareñge

'payām' nākām haiñ to kyā hai nahīñ hai fitrat meñ nā-umīdī

karam kī ummīd par hai jiinā kabhī to mehr-o-vafā kareñge

hazar hum par sitam karenge hazar jaur-o-jafa karenge

na hum ne tark-e-wafa kiya hai kabhi na tark-e-wafa karenge

nahin hain aasan wafa ki rahen qadam qadam hai nai qayamat

KHirad kahan apne kaam aai junun ko ab rahnuma karenge

na koi dushman bujha sake hain na koi aandhi bujha sakegi

charagh ulfat ke is jahan mein jala kiye hain jala karenge

yahi parastish hai ab hamari yahi hai ab bandagi hamari

jahan bhi hon zulf-o-ruKH ke sae wahin pe sajde kya karenge

hai dushmanon se bhi pyar hum ko ki dosti hai shiar apna

bichhaenge rah mein jo kanTe hum un ke haq mein dua karenge

nahin ye aish-o-tarab ki mahfil maqam-e-jahd-o-amal hai duniya

unhin ko jine ka haq milega jo zist ka haq ada karenge

'payam' nakaam hain to kya hai nahin hai fitrat mein na-umidi

karam ki ummid par hai jina kabhi to mehr-o-wafa karenge