hazar martaba dekha sitam judai ka

hazār martaba dekhā sitam judā.ī kā

hanūz hausla baaqī hai āshnā.ī kā

parī uThī mire pahlū se bārhā nākām

farefta huuñ tirī tarz-e-dilrubā.ī kā

mujhe azāb-e-jahannam ki but-parast huuñ maiñ

vo but bahisht meñ dā'vā jise ḳhudā.ī kā

fazā-e-bāġh se hai gosha-e-qafas ḳhush-tar

gar apne dil meñ na ho daġhdaġha rihā.ī kā

adab na vādī-e-vahshat ke mujh se tark hue

junūñ meñ hosh rahā hai barahna-pā.ī kā

nigāh ḳhanda taġhāful 'itāb kohna hue

nikāl tarz nayā koī dilrubā.ī kā

butoñ kā sajda mirī sarnavisht meñ kab thā

ki 'azm kā'ba ke dar par ho jubba-sā.ī kā

uchak rahā hai khaḌā bām-e-arsh par kam-baḳht

qalaq hai mujh ko 'shahīdī' kī nā-rasā.ī kā

hazar martaba dekha sitam judai ka

hanuz hausla baqi hai aashnai ka

pari uThi mere pahlu se barha nakaam

farefta hun teri tarz-e-dilrubai ka

mujhe azab-e-jahannam ki but-parast hun main

wo but bahisht mein da'wa jise KHudai ka

faza-e-bagh se hai gosha-e-qafas KHush-tar

gar apne dil mein na ho daghdagha rihai ka

adab na wadi-e-wahshat ke mujh se tark hue

junun mein hosh raha hai barahna-pai ka

nigah KHanda taghaful 'itab kohna hue

nikal tarz naya koi dilrubai ka

buton ka sajda meri sarnawisht mein kab tha

ki 'azm ka'ba ke dar par ho jubba-sai ka

uchak raha hai khaDa baam-e-arsh par kam-baKHt

qalaq hai mujh ko 'shahidi' ki na-rasai ka