hazar maslahat-e-waqt sath sath rahi

hazār maslahat-e-vaqt saath saath rahī

junūñ ke sāmne baazī ḳhirad kī maat rahī

jahāñ bhī maiñ ne imārat kā ehtirām kiyā

vahīñ pe ruuTh ke mujh se mirī hayāt rahī

tirī nigāh-e-karam par yaqīn kyā aayā

fareb-e-husn meñ ye saarī kā.enāt rahī

vo ik kalī ne chaTak kar chaman ko samjhā dī

jo bāt-chīt sitāroñ se saarī raat rahī

ḳhirad ne laakh dikhā.īñ vafā kī tasvīreñ

mirī nigāh magar jānib-e-furāt rahī

vo dasht ho ki falak-bos gumbad-o-mehrāb

ġharaz ki ho ke mohabbat kī vārdāt rahī

ye apne apne samajhne kā farq hai 'rāje'

kahāñ nigāh-e-karam nazr-e-iltifāt rahī

hazar maslahat-e-waqt sath sath rahi

junun ke samne bazi KHirad ki mat rahi

jahan bhi main ne imarat ka ehtiram kiya

wahin pe ruTh ke mujh se meri hayat rahi

teri nigah-e-karam par yaqin kya aaya

fareb-e-husn mein ye sari kaenat rahi

wo ek kali ne chaTak kar chaman ko samjha di

jo baat-chit sitaron se sari raat rahi

KHirad ne lakh dikhain wafa ki taswiren

meri nigah magar jaanib-e-furaat rahi

wo dasht ho ki falak-bos gumbad-o-mehrab

gharaz ki ho ke mohabbat ki wardat rahi

ye apne apne samajhne ka farq hai 'raje'

kahan nigah-e-karam nazr-e-iltifat rahi