hazar rang ye wahshat qadam qadam pe khuli

hazār rañg ye vahshat qadam qadam pe khulī

ki zindagī kī haqīqat qadam qadam pe khulī

mire vajūd kā uqda kabhī bhī khul na sakā

mire ḳhayāl kī vus.at qadam qadam pe khulī

sirāt-e-jāñ pe hamesha safar talab hī rahe

masāfatoñ se aqīdat qadam qadam pe khulī

vafā kī raah meñ chup-chāp chalte rahne se

gurez-kosh mohabbat qadam qadam pe khulī

dayār-e-ishq meñ ham par karam kuchh aise huā

visāl-e-ġham kī suhūlat qadam qadam pe khulī

vo ek lafz ki jis par badal gayā lahja

us ek lafz kī shiddat qadam qadam pe khulī

tamām-umr sarāboñ kī justujū meñ kaTī

kabhī na thī jo zarūrat qadam qadam pe khulī

hazar rang ye wahshat qadam qadam pe khuli

ki zindagi ki haqiqat qadam qadam pe khuli

mere wajud ka uqda kabhi bhi khul na saka

mere KHayal ki wusat qadam qadam pe khuli

siraat-e-jaan pe hamesha safar talab hi rahe

masafaton se aqidat qadam qadam pe khuli

wafa ki rah mein chup-chap chalte rahne se

gurez-kosh mohabbat qadam qadam pe khuli

dayar-e-ishq mein hum par karam kuchh aise hua

visal-e-gham ki suhulat qadam qadam pe khuli

wo ek lafz ki jis par badal gaya lahja

us ek lafz ki shiddat qadam qadam pe khuli

tamam-umr sarabon ki justuju mein kaTi

kabhi na thi jo zarurat qadam qadam pe khuli