ہزار روپ فروزاں ہیں روشنی کی طرح

ہزار روپ فروزاں ہیں روشنی کی طرح

وہ اپنے رنگ میں تنہا ہے چاندنی کی طرح

یہی نہیں کہ زمانے سے رسم و راہ نہ کی

ہم اپنے گھر میں بھی رہتے ہیں اجنبی کی طرح

جلوس والے مکانوں کو پھونک بھی دیتے

یہی بہت ہے کہ گزرے ہیں آدمی کی طرح

جدھر نگاہ اٹھاؤ دکھائی دیتا ہے

ترا وجود مناظر میں دل کشی کی طرح

وہ تو نہیں تھا کہ میں ہی بدل گیا اے دوست

ترے قریب سے گزرا ہوں اجنبی کی طرح

بھٹک رہا ہوں سمندر کی جستجو میں ضیاؔ

مرا وجود ہے بہتی ہوئی ندی کی طرح