hazar subh ne kirnon ke jal phailae

hazār sub.h ne kirnoñ ke jaal phailā.e

magar simaT na sake raat ke ghane saa.e

tavāf kartī hai manzil usī musāfir kā

jo rāstoñ ke ḳham-o-pech se na ghabrā.e

ye intizār kī ghaḌiyāñ baḌī ġhanīmat haiñ

ḳhudā kare ki yūñhī zindagī guzar jaa.e

shamīm-e-gul se kisī pairahan kī ḳhushbū tak

the silsile hī kuchh aise ki jo na raas aa.e

ḳhayāl aayā jahāñ raah meñ Thaharne kā

vahīñ jhulastī huī dhuup meñ Dhale saa.e

jahāñ jahāñ ga.e logoñ kī rahbarī ke liye

ham apne naqsh-e-qadam rāstoñ meñ chhoḌ aa.e

dam ab ulajhne lagā hai bahut hī rishtoñ se

hameñ zamāna ye zanjīr ab na pahnā.e

hameñ nahīñ hai tahī-dāmanī kā ġham hargiz

haiñ apne paas bahut hādsoñ ke sarmā.e

'zafar' ḳhizāñ to bahar-hāl thī ḳhizāñ lekin

bahār aa.ī to kuchh aur phuul murjhā.e

hazar subh ne kirnon ke jal phailae

magar simaT na sake raat ke ghane sae

tawaf karti hai manzil usi musafir ka

jo raston ke KHam-o-pech se na ghabrae

ye intizar ki ghaDiyan baDi ghanimat hain

KHuda kare ki yunhi zindagi guzar jae

shamim-e-gul se kisi pairahan ki KHushbu tak

the silsile hi kuchh aise ki jo na ras aae

KHayal aaya jahan rah mein Thaharne ka

wahin jhulasti hui dhup mein Dhale sae

jahan jahan gae logon ki rahbari ke liye

hum apne naqsh-e-qadam raston mein chhoD aae

dam ab ulajhne laga hai bahut hi rishton se

hamein zamana ye zanjir ab na pahnae

hamein nahin hai tahi-damani ka gham hargiz

hain apne pas bahut hadson ke sarmae

'zafar' KHizan to bahar-haal thi KHizan lekin

bahaar aai to kuchh aur phul murjhae