hazaron mushkilen hain aur lakhon gham liye hain hum

hazāroñ mushkileñ haiñ aur lākhoñ ġham liye haiñ ham

mohabbat kā magar hāthoñ meñ ik parcham liye haiñ ham

vo naġhme jo ḳhizāñ ko phir bahār-e-nau banāte haiñ

unhī gītoñ kī hoñToñ par na.ī sargam liye haiñ ham

hamāre dil meñ hai jazbāt kā taptā huā sūraj

jo palkoñ se chunī vo dard kī shabnam liye haiñ ham

mubārak ho ḳhirad vāloñ tumheñ fikr-o-nazar apnī

haiñ ahl-e-dil bahār-e-ishq ke mausam liye haiñ ham

palaTiye gar kabhī fursat mile aurāq maazī ke

hamārī kyā sifat bhī aur kyā kyā ġham liye haiñ ham

samajh lī ab haqīqat rahbarān-e-mulk kī sab ne

namak chuTkī meñ le kar kah rahe marham liye haiñ ham

hazaron mushkilen hain aur lakhon gham liye hain hum

mohabbat ka magar hathon mein ek parcham liye hain hum

wo naghme jo KHizan ko phir bahaar-e-nau banate hain

unhi giton ki honTon par nai sargam liye hain hum

hamare dil mein hai jazbaat ka tapta hua suraj

jo palkon se chuni wo dard ki shabnam liye hain hum

mubarak ho KHirad walon tumhein fikr-o-nazar apni

hain ahl-e-dil bahaar-e-ishq ke mausam liye hain hum

palaTiye gar kabhi fursat mile auraq mazi ke

hamari kya sifat bhi aur kya kya gham liye hain hum

samajh li ab haqiqat rahbaran-e-mulk ki sab ne

namak chuTki mein le kar kah rahe marham liye hain hum