hazaron parde mein parda nahin hai

hazāroñ parde meñ parda nahīñ hai

vo jalva ho ke bhī jalva nahīñ hai

vajūd-e-ġhair hai apnā nahīñ hai

vahī qatra hai jo dariyā nahīñ hai

anal-haq meñ burā.ī kyā hai vaa.iz

mohabbat meñ ḳhudā kyā kyā nahīñ hai

luTā de jalva ai husn-e-sarāpā

nigāhoñ par koī pahra nahīñ hai

safīrān-e-mohabbat jānte haiñ

ki manzil hai magar rasta nahīñ hai

ajab ye mas.ala hai mai-kashoñ kā

kabhī saaqī kabhī sahbā nahīñ hai

guloñ ke dam se hai pindār-e-hastī

abhī nik.hat ne ye samjhā nahīñ hai

mirī āñkhoñ kī duniyā ko to dekho

jahāñ tum ne abhī dekhā nahīñ hai

use jis naam se chāho pukāro

mohabbat kā koī firqa nahīñ hai

mirī har saañs hai mansūb us se

mirī qismat meñ jo likkhā nahīñ hai

ġham-e-māzī pe mātam karne vaalo

ġham-e-māzī ġham-e-fardā nahīñ hai

hazaron parde mein parda nahin hai

wo jalwa ho ke bhi jalwa nahin hai

wajud-e-ghair hai apna nahin hai

wahi qatra hai jo dariya nahin hai

anal-haq mein burai kya hai waiz

mohabbat mein KHuda kya kya nahin hai

luTa de jalwa ai husn-e-sarapa

nigahon par koi pahra nahin hai

safiran-e-mohabbat jaante hain

ki manzil hai magar rasta nahin hai

ajab ye masala hai mai-kashon ka

kabhi saqi kabhi sahba nahin hai

gulon ke dam se hai pindar-e-hasti

abhi nikhat ne ye samjha nahin hai

meri aankhon ki duniya ko to dekho

jahan tum ne abhi dekha nahin hai

use jis nam se chaho pukaro

mohabbat ka koi firqa nahin hai

meri har sans hai mansub us se

meri qismat mein jo likkha nahin hai

gham-e-mazi pe matam karne walo

gham-e-mazi gham-e-farda nahin hai