ہزاروں پیچ و خم اور جستجوئے دائمی کب تک

ہزاروں پیچ و خم اور جستجوئے دائمی کب تک

اگر منزل کوئی شے ہے تو پھر یہ گمرہی کب تک

گریزاں جادۂ انسانیت سے آدمی کب تک

چھپائی جائے گی تاریکیوں میں روشنی کب تک

رہے کوئی پریشاں حال و محروم خوشی کب تک

سلگتی ڈوبتی سہمی ہوئی سی زندگی کب تک

زباں دی ہے تو پھر حکم زباں بندی سے کیا حاصل

اب اذن لب کشائی دے یہ جبر خامشی کب تک

دم نظارہ اک شعلہ سا چمکا ہوش کھو بیٹھے

نہیں معلوم اس کے بعد یہ حالت رہی کب تک

اجازت ہو اگر تو پوچھ لوں ان ہوش والوں سے

رہے گی بحث کا عنواں مری دیوانگی کب تک

تڑپتی چیختی روتی ہوئی غم ناک و افسردہ

اسی کا نام اگر ہے زندگی تو زندگی کب تک

ذرا بگڑے ہوئے انساں کو ہوش آ جائے تو پوچھوں

یہ خود بینی کہاں تک یہ فریب آگہی کب تک

نہیں ملتا تو پھر خود اپنا حصہ چھین لے بڑھ کر

یہ مجبوری کی دھن پر نغمۂ بے چارگی کب تک

کوئی آسودہ و سیراب کیوں ہوتا نہیں میکشؔ

یہ مے خانہ ہے میخانے میں دور تشنگی کب تک