hazaron pech-o-KHam aur justuju-e-daimi kab tak

hazāroñ pech-o-ḳham aur justujū-e-dā.imī kab tak

agar manzil koī shai hai to phir ye gumrahī kab tak

gurezāñ jāda-e-insāniyat se aadmī kab tak

chhupā.ī jā.egī tārīkiyoñ meñ raushnī kab tak

rahe koī pareshāñ-hāl-o-mahrūm-e-ḳhushī kab tak

sulagtī Dūbtī sahmī huī sī zindagī kab tak

zabāñ dī hai to phir hukm-e-zabāñ-bandī se kyā hāsil

ab izn-e-lab-kushā.ī de ye jabr-e-ḳhāmushī kab tak

dam-e-nazzāra ik sho'la sā chamkā hosh kho baiThe

nahīñ mā'lūm us ke baa'd ye hālat rahī kab tak

ijāzat ho agar to pūchh luuñ in hosh vāloñ se

rahegī bahs kā 'unvāñ mirī dīvāngī kab tak

taḌaptī chīḳhtī rotī huī ġhamnāk-o-afsurda

isī kā naam agar hai zindagī to zindagī kab tak

zarā bigḌe hue insāñ ko hosh aa jaa.e to pūchhūñ

ye ḳhud-bīnī kahāñ tak ye fareb-e-āgahī kab tak

nahīñ miltā to phir ḳhud apnā hissa chhīn le baḌh kar

ye majbūrī kī dhun par naġhma-e-bechārgī kab tak

koī āsūda-o-sairāb kyoñ hotā nahīñ 'maikash'

ye mai-ḳhāna hai maiḳhāne meñ daur-e-tishnagī kab tak

hazaron pech-o-KHam aur justuju-e-daimi kab tak

agar manzil koi shai hai to phir ye gumrahi kab tak

gurezan jada-e-insaniyat se aadmi kab tak

chhupai jaegi tarikiyon mein raushni kab tak

rahe koi pareshan-haal-o-mahrum-e-KHushi kab tak

sulagti Dubti sahmi hui si zindagi kab tak

zaban di hai to phir hukm-e-zaban-bandi se kya hasil

ab izn-e-lab-kushai de ye jabr-e-KHamushi kab tak

dam-e-nazzara ek sho'la sa chamka hosh kho baiThe

nahin ma'lum us ke ba'd ye haalat rahi kab tak

ijazat ho agar to puchh lun in hosh walon se

rahegi bahs ka 'unwan meri diwangi kab tak

taDapti chiKHti roti hui ghamnak-o-afsurda

isi ka nam agar hai zindagi to zindagi kab tak

zara bigDe hue insan ko hosh aa jae to puchhun

ye KHud-bini kahan tak ye fareb-e-agahi kab tak

nahin milta to phir KHud apna hissa chhin le baDh kar

ye majburi ki dhun par naghma-e-bechaargi kab tak

koi aasuda-o-sairab kyon hota nahin 'maikash'

ye mai-KHana hai maiKHane mein daur-e-tishnagi kab tak