hazrat-e-dil ye ishq hai dard se kasmasae kyun

hazrat-e-dil ye ishq hai dard se kasmasā.e kyuuñ

maut abhī se aa.e kyuuñ jaan abhī se jaa.e kyuuñ

ishq kā rutba hai baḌā ishq ḳhudā se jā milā

aap ne kyā samajh liyā aap ye muskurā.e kyuuñ

merā ġhalat gila sahī zulm-o-jafā ravā sahī

nāz-e-sitam bajā sahī aañkh koī churā.e kyuuñ

tujh se ziyāda nāznīñ is meñ hazāroñ haiñ hasīñ

dil hai ye ā.īna nahīñ sāmne tere aa.e kyuuñ

āshiq-e-nā-murād ko is kī razā pe chhoḌ do

is kī agar ḳhushī na ho ġham se najāt paa.e kyuuñ

hausla-e-sitam baḌhe teġh-o-sināñ kā dam baḌhe

ek hī tīr-e-nāz meñ kījiye haa.e haa.e kyuuñ

'ġhālib'-e-ḳhush-bayāñ kahāñ 'beḳhud'-e-ḳhasta-jāñ kahāñ

tab.a kā imtihāñ kahāñ shaad mujhe satā.e kyuuñ

hazrat-e-dil ye ishq hai dard se kasmasae kyun

maut abhi se aae kyun jaan abhi se jae kyun

ishq ka rutba hai baDa ishq KHuda se ja mila

aap ne kya samajh liya aap ye muskurae kyun

mera ghalat gila sahi zulm-o-jafa rawa sahi

naz-e-sitam baja sahi aankh koi churae kyun

tujh se ziyaada naznin is mein hazaron hain hasin

dil hai ye aaina nahin samne tere aae kyun

aashiq-e-na-murad ko is ki raza pe chhoD do

is ki agar KHushi na ho gham se najat pae kyun

hausla-e-sitam baDhe tegh-o-sinan ka dam baDhe

ek hi tir-e-naz mein kijiye hae hae kyun

'ghaalib'-e-KHush-bayan kahan 'beKHud'-e-KHasta-jaan kahan

taba ka imtihan kahan shad mujhe satae kyun