hazrat-e-mir ke shagird hain ruhani hum

hazrat-e-mīr ke shāgird haiñ rūhānī ham

sher taḳhlīq kiyā karte haiñ lā-fānī ham

ham jo dariyā ke kināroñ pe rahā karte haiñ

ishq kī mauj meñ bahte haiñ ba-āsānī ham

terī shādābī-e-ḳhātir kī duā karte haiñ

jab bhī āñchal ko tire dekhte haiñ dhānī ham

ya.anī us aadmī se koī hameñ matlab hai

bāteñ har ek se karte nahīñ lā ya.anī ham

vaqt ke saath har ik chiiz badal jaatī hai

pahle kahte the saraiki ko multānī ham

aisā lagtā hai ki sab apne sivā jāhil haiñ

baat jab jaan liyā karte haiñ anjānī ham

ham tire baal bikhereñge khule sāhil par

tere hisse kī tujhe deñge pareshānī ham

zindagī zaḳhm to degī kabhī yāroñ ko bhī

muTThiyāñ bhar ke kareñge namak-afshānī ham

ham se laḌkī koī iThlā ke jo bāteñ kar le

use guḌiyā hī samajh lete haiñ jāpānī ham

dekh āshiq haiñ tire baap ke naukar to nahīñ

jo tire husn kī karte raheñ darbānī ham

sab sitāroñ se nazar aaj bachā kar 'yāvar'

chuum aa.e haiñ koī chāñd sī peshānī ham

hazrat-e-mir ke shagird hain ruhani hum

sher taKHliq kiya karte hain la-fani hum

hum jo dariya ke kinaron pe raha karte hain

ishq ki mauj mein bahte hain ba-asani hum

teri shadabi-e-KHatir ki dua karte hain

jab bhi aanchal ko tere dekhte hain dhani hum

yani us aadmi se koi hamein matlab hai

baaten har ek se karte nahin la yani hum

waqt ke sath har ek chiz badal jati hai

pahle kahte the saraiki ko multani hum

aisa lagta hai ki sab apne siwa jahil hain

baat jab jaan liya karte hain anjaani hum

hum tere baal bikherenge khule sahil par

tere hisse ki tujhe denge pareshani hum

zindagi zaKHm to degi kabhi yaron ko bhi

muTThiyan bhar ke karenge namak-afshani hum

hum se laDki koi iThla ke jo baaten kar le

use guDiya hi samajh lete hain japani hum

dekh aashiq hain tere bap ke naukar to nahin

jo tere husn ki karte rahen darbani hum

sab sitaron se nazar aaj bacha kar 'yawar'

chum aae hain koi chand si peshani hum