hichkiyan le ke na ro qabr pe rone wale

hichkiyāñ le ke na ro qabr pe rone vaale

jaag jaa.eñ na kahīñ chain se sone vaale

nā-ḳhudāoñ pe yaqīñ soch-samajh kar karnā

lā ke sāhil pe Dubote haiñ Dubone vaale

fasl-e-nau talḳh na hogī to bhalā kyā hogī

biij zahrīle agar bo.eñge bone vaale

qatra qatra mire is ḳhuuñ kī gavāhī degā

laakh dāman se lahū dho mirā dhone vaale

kyā milegā tujhe zardār se nafrat ke sivā

pairahan apnā pasīne meñ bhigone vaale

dekh ai gardish-e-daurāñ nahīñ Takrā ham se

sar pe tanhā.ī kā ham bojh haiñ Dhone vaale

krishn kī rādhā se kah do ki zamāne meñ 'mayank'

ab vo andāz kahāñ shyām salone vaale

hichkiyan le ke na ro qabr pe rone wale

jag jaen na kahin chain se sone wale

na-KHudaon pe yaqin soch-samajh kar karna

la ke sahil pe Dubote hain Dubone wale

fasl-e-nau talKH na hogi to bhala kya hogi

bij zahrile agar boenge bone wale

qatra qatra mere is KHun ki gawahi dega

lakh daman se lahu dho mera dhone wale

kya milega tujhe zardar se nafrat ke siwa

pairahan apna pasine mein bhigone wale

dekh ai gardish-e-dauran nahin Takra hum se

sar pe tanhai ka hum bojh hain Dhone wale

krishn ki radha se kah do ki zamane mein 'mayank'

ab wo andaz kahan shyam salone wale