hijab-e-jism-o-jaan mein husn-e-pinhan dekh lete hain

hijāb-e-jism-o-jāñ meñ husn-e-pinhāñ dekh lete haiñ

nazar vaale tumheñ tā-had-e-imkāñ dekh lete haiñ

asīr-e-zulf ho kar rū-e-jānāñ dekh lete haiñ

savād-e-kufr meñ bhī nūr-e-īmāñ dekh lete haiñ

zamāna merā hāsil hai maiñ hāsil huuñ zamāne kā

jo ahl-e-bazm haiñ mahfil kā sāmāñ dekh lete haiñ

hamāre Dūbne kā vāqi'a jab yaad aatā hai

jo sāhil par bhī haiñ sāhil kā dāmāñ dekh lete haiñ

dil is par aarzū āsūda ho jaatā hai duniyā se

kabhī gar manzar-e-gor-e-ġharībāñ dekh lete haiñ

guzarte haiñ janāb-e-shaiḳh jab mai-ḳhāna se ho kar

nahīñ kahte zabāñ se kuchh magar haañ dekh lete haiñ

tirā hī jalva go dair-o-haram donoñ meñ hai lekin

jo ahl-e-dil haiñ farq-e-kufr-o-īmāñ dekh lete haiñ

zamīñ se āsmāñ se go kahīñ bijlī gire lekin

asīrān-e-qafas sū-e-gulistāñ dekh lete haiñ

pahuñch jaate haiñ ham 'afqar' vahāñ zauq-e-tabī.at se

jo shāyān-e-adab bazm-e-suḳhan-dāñ dekh lete haiñ

hijab-e-jism-o-jaan mein husn-e-pinhan dekh lete hain

nazar wale tumhein ta-had-e-imkan dekh lete hain

asir-e-zulf ho kar ru-e-jaanan dekh lete hain

sawad-e-kufr mein bhi nur-e-iman dekh lete hain

zamana mera hasil hai main hasil hun zamane ka

jo ahl-e-bazm hain mahfil ka saman dekh lete hain

hamare Dubne ka waqi'a jab yaad aata hai

jo sahil par bhi hain sahil ka daman dekh lete hain

dil is par aarzu aasuda ho jata hai duniya se

kabhi gar manzar-e-gor-e-ghariban dekh lete hain

guzarte hain janab-e-shaiKH jab mai-KHana se ho kar

nahin kahte zaban se kuchh magar han dekh lete hain

tera hi jalwa go dair-o-haram donon mein hai lekin

jo ahl-e-dil hain farq-e-kufr-o-iman dekh lete hain

zamin se aasman se go kahin bijli gire lekin

asiran-e-qafas su-e-gulistan dekh lete hain

pahunch jate hain hum 'afqar' wahan zauq-e-tabiat se

jo shayan-e-adab bazm-e-suKHan-dan dekh lete hain