hijab-e-raaz faiz-e-murshid-e-kaamil se uThta hai

hijāb-e-rāz faiz-e-murshid-e-kāmil se uThtā hai

nazar haq-āshnā hotī hai parda dil se uThtā hai

jalā jaatā huuñ bār-e-soz-e-ġham mushkil se uThtā hai

vo ashkoñ se nahīñ bujhtā jo shola dil se uThtā hai

kahāñ ḳhanjar bhī dast-e-nāvak-e-qātil se uThtā hai

nazākat se hinā kā baar bhī mushkil se uThtā hai

ye kis ne Daal dī bahr-e-talātum-ḳhez meñ kashtī

ye shor-e-harche-bāda-e-bād kyuuñ sāhil se uThtā hai

kashīda jis se tum hote ho koī ruḳh nahīñ kartā

girāte ho nazar se tum jise mushkil se uThtā hai

ye aañsū kasm-pursī kis ke mātam meñ bahātī hai

janāza aaj kis kā kūcha-e-qātil se uThtā hai

magar tāsīr paidā ho ga.ī majnūñ ke nāloñ meñ

ki parda aaj dast-e-laila-e-mahmil se uThtā hai

ruḳh-e-be-parda un kā yaad aatā hai shab-e-hijrāñ

hijāb-e-abr jab rū-e-mah-e-kāmil se uThtā hai

lagā dī ātish-e-ḳhāmosh kyā soz-e-mohabbat ne

ilāhī ḳhair dūd-e-āh-e-sozāñ dil se uThtā hai

kiyā sharminda itnā saḳht-jānī ne nazākat se

ḳhajālat se sar un ke sāmne mushkil se uThtā hai

kaleja thaam leñ dīdār-e-jānāñ dekhne vaale

bas ab parda ruḳh-e-rashk-e-mah-e-kāmil se uThtā hai

chale ahbāb āġhosh-e-lahad meñ chhoḌ kar mujh ko

ki hamdardī kā jazba pahlī hī manzil se uThtā hai

hijab-e-raaz faiz-e-murshid-e-kaamil se uThta hai

nazar haq-ashna hoti hai parda dil se uThta hai

jala jata hun bar-e-soz-e-gham mushkil se uThta hai

wo ashkon se nahin bujhta jo shola dil se uThta hai

kahan KHanjar bhi dast-e-nawak-e-qatil se uThta hai

nazakat se hina ka bar bhi mushkil se uThta hai

ye kis ne Dal di bahr-e-talatum-KHez mein kashti

ye shor-e-harche-baada-e-baad kyun sahil se uThta hai

kashida jis se tum hote ho koi ruKH nahin karta

giraate ho nazar se tum jise mushkil se uThta hai

ye aansu kasm-pursi kis ke matam mein bahati hai

janaza aaj kis ka kucha-e-qatil se uThta hai

magar tasir paida ho gai majnun ke nalon mein

ki parda aaj dast-e-laila-e-mahmil se uThta hai

ruKH-e-be-parda un ka yaad aata hai shab-e-hijran

hijab-e-abr jab ru-e-mah-e-kaamil se uThta hai

laga di aatish-e-KHamosh kya soz-e-mohabbat ne

ilahi KHair dud-e-ah-e-sozan dil se uThta hai

kiya sharminda itna saKHt-jaani ne nazakat se

KHajalat se sar un ke samne mushkil se uThta hai

kaleja tham len didar-e-jaanan dekhne wale

bas ab parda ruKH-e-rashk-e-mah-e-kaamil se uThta hai

chale ahbab aaghosh-e-lahad mein chhoD kar mujh ko

ki hamdardi ka jazba pahli hi manzil se uThta hai