hijab koi nahin hai naqab koi nahin

hijāb koī nahīñ hai naqāb koī nahīñ

mirī khulī huī āñkhoñ meñ ḳhvāb koī nahīñ

hai bas sukūñ hī sukūñ iztirāb koī nahīñ

is inqalāb ke baad inqalāb koī nahīñ

hayāt-e-ishq meñ ye vaqfa-e-sukūñ kaisā

savāl koī nahīñ hai javāb koī nahīñ

jahān-e-ilm kā yaaro ajiib hai dastūr

ki madrase to bahut haiñ nisāb koī nahīñ

shab-e-siyah meñ bhalā kaun aane vaalā hai

koī nahīñ dil-e-ḳhāna-ḳharāb koī nahīñ

talab kī raah meñ har shaḳhs hai barābar kā

yahāñ sabhī haiñ samundar sarāb koī nahīñ

shab-e-firāq kuchh is tarah mutma.in huuñ 'ziyā'

ki jaise dīda-o-dil par azaab koī nahīñ

hijab koi nahin hai naqab koi nahin

meri khuli hui aankhon mein KHwab koi nahin

hai bas sukun hi sukun iztirab koi nahin

is inqalab ke baad inqalab koi nahin

hayat-e-ishq mein ye waqfa-e-sukun kaisa

sawal koi nahin hai jawab koi nahin

jahan-e-ilm ka yaro ajib hai dastur

ki madrase to bahut hain nisab koi nahin

shab-e-siyah mein bhala kaun aane wala hai

koi nahin dil-e-KHana-KHarab koi nahin

talab ki rah mein har shaKHs hai barabar ka

yahan sabhi hain samundar sarab koi nahin

shab-e-firaq kuchh is tarah mutmain hun 'ziya'

ki jaise dida-o-dil par azab koi nahin