hijazi le gai humne bhulae taur-e-turkani

hijāzī le ga.ī ham ne bhulā.e taur-e-turkānī

bachī le de ke ham meñ ab faqat apnoñ kī man-mānī

jamāl-e-sub.h paidā kar ki nāzir ḳhud-baḳhud aa.eñ

uḌā lahje se vo ḳhushbū lage jo bū-e-bustānī

hukūmat kā tamāsha hai imārat kā takabbur hai

jo kal āzād the vo aaj ban baiThe haiñ zindānī

sañbhal ai naujavān ab vaqt bhī nazdīk aatā hai

mujhe to ḳhuuñ rulātī hai lahū kī tere arzānī

ta.ayyush meñ gañvā baiThegā mīrās-e-salaf sun le

jafā-kash ban to phir terā hai ye taḳht-e-sulaimānī

kahāñ terī hamiyyat aur ġhairat hai vahī jis se

Dare the qaisar-o-kisrā girā thā tāj-e-ḳhāqānī

halākat-ḳhez daldal meñ utārā kis ne ummat ko

batā 'dānish' vo jur.at thī ki thā andāz-e-rahbānī

hijazi le gai hum ne bhulae taur-e-turkani

bachi le de ke hum mein ab faqat apnon ki man-mani

jamal-e-subh paida kar ki nazir KHud-baKHud aaen

uDa lahje se wo KHushbu lage jo bu-e-bustani

hukumat ka tamasha hai imarat ka takabbur hai

jo kal aazad the wo aaj ban baiThe hain zindani

sanbhal ai naujawan ab waqt bhi nazdik aata hai

mujhe to KHun rulati hai lahu ki tere arzani

tayyush mein ganwa baiThega miras-e-salaf sun le

jafa-kash ban to phir tera hai ye taKHt-e-sulaimani

kahan teri hamiyyat aur ghairat hai wahi jis se

Dare the qaisar-o-kisra gira tha taj-e-KHaqani

halakat-KHez daldal mein utara kis ne ummat ko

bata 'danish' wo jurat thi ki tha andaz-e-rahbani