hijr dega na kabhi gham ki ghaTaen dega

hijr degā na kabhī ġham kī ghaTā.eñ degā

paas rakh kar mujhe qurbat kī sazā.eñ degā

ye khilaune nahīñ rozī kā vasīla kar do

merā bachcha tumheñ din raat du'ā.eñ degā

saarī bastī thī mire qatl kī sāzish meñ sharīk

ek munsif bhalā kis kis ko sazā.eñ degā

be-ridā shahr meñ tum ḳhud hī zarā ye socho

merī bahnoñ ko bhalā kaun ridā.eñ degā

dushmanī ḳhatm na karnā ki bharī bastī meñ

phir mujhe āḳhir-e-shab kaun sadā.eñ degā

mujh se milnā hai to phir sīdhe chale ā.iyegā

rāsta koī tumheñ daa.eñ na baa.eñ degā

kisht-e-nafrat meñ to jo peḌ ugegā 'ishrat'

saaya degā nahīñ zahrīlī havā.eñ degā

hijr dega na kabhi gham ki ghaTaen dega

pas rakh kar mujhe qurbat ki sazaen dega

ye khilaune nahin rozi ka wasila kar do

mera bachcha tumhein din raat du'aen dega

sari basti thi mere qatl ki sazish mein sharik

ek munsif bhala kis kis ko sazaen dega

be-rida shahr mein tum KHud hi zara ye socho

meri bahnon ko bhala kaun ridaen dega

dushmani KHatm na karna ki bhari basti mein

phir mujhe aaKHir-e-shab kaun sadaen dega

mujh se milna hai to phir sidhe chale aaiyega

rasta koi tumhein daen na baen dega

kisht-e-nafrat mein to jo peD ugega 'ishrat'

saya dega nahin zahrili hawaen dega