ہجر بے مہر سے آزاد ہوا چاہتے ہیں

ہجر بے مہر سے آزاد ہوا چاہتے ہیں

دن نکلتا ہے تو شب زاد ہوا چاہتے ہیں

نعمتیں پا کے بھی خوش ہوتے نہیں ہیں کچھ لوگ

اور کچھ صاحب اولاد ہوا چاہتے ہیں

کاش اک بار وہ سینے سے لگا لے ہم کو

چند لمحے ہی سہی شاد ہوا چاہتے ہیں

ایک لمحے کے لئے بھول نہ پائیں ہم کو

ہم انہیں مثل دعا یاد ہوا چاہتے ہیں

عشق وہ ساعت امکاں ہے جو ڈھلتی ہی نہیں

ہم اسی واسطے فرہاد ہوا چاہتے ہیں

التمشؔ ٹھہرا تھا اک قافلہ پیاسوں کا جہاں

ہم اسی دشت کی روداد ہوا چاہتے ہیں