hijr-e-jaanan mein baDe hi kaam ka dil ho gaya

hijr-e-jānāñ meñ baḌe hī kaam kā dil ho gayā

jalte jalte ye charāġh-e-rāh-e-manzil ho gayā

martaba dariyā kā ḳhud qatre ko hāsil ho gayā

qatra-e-nāchīz jab dariyā meñ shāmil ho gayā

aa ke baiThe haiñ dam-e-āḳhir mirī bālīñ pe vo

zindagī dushvār thī marnā bhī mushkil ho gayā

tiir kā paikāñ vo thā jab tak tirī chuTkī meñ thā

jab mire pahlū meñ aa baiThā mirā dil ho gayā

ġharq ho kar ziist kī kashtī Thikāne lag ga.ī

jis ko ham girdāb samjhe the vo sāhil ho gayā

baḳhshisheñ terī bahut kuchh haiñ magar ai ‘ishq-e-yār

ye bhī kyā kam hai ki ġham sahne ke qābil ho gayā

dām-e-gesū se rihā.ī us ne dī ab ai 'vafā'

jab mirā dil ḳhūgar-e-tauq-o-salāsil ho gayā

hijr-e-jaanan mein baDe hi kaam ka dil ho gaya

jalte jalte ye charagh-e-rah-e-manzil ho gaya

martaba dariya ka KHud qatre ko hasil ho gaya

qatra-e-nachiz jab dariya mein shamil ho gaya

aa ke baiThe hain dam-e-aKHir meri baalin pe wo

zindagi dushwar thi marna bhi mushkil ho gaya

tir ka paikan wo tha jab tak teri chuTki mein tha

jab mere pahlu mein aa baiTha mera dil ho gaya

gharq ho kar zist ki kashti Thikane lag gai

jis ko hum girdab samjhe the wo sahil ho gaya

baKHshishen teri bahut kuchh hain magar ai ‘ishq-e-yar

ye bhi kya kam hai ki gham sahne ke qabil ho gaya

dam-e-gesu se rihai us ne di ab ai 'wafa'

jab mera dil KHugar-e-tauq-o-salasil ho gaya