ہجر جاناں میں بڑے ہی کام کا دل ہو گیا

ہجر جاناں میں بڑے ہی کام کا دل ہو گیا

جلتے جلتے یہ چراغ راہ منزل ہو گیا

مرتبہ دریا کا خود قطرے کو حاصل ہو گیا

قطرۂ ناچیز جب دریا میں شامل ہو گیا

آ کے بیٹھے ہیں دم آخر مری بالیں پہ وہ

زندگی دشوار تھی مرنا بھی مشکل ہو گیا

تیر کا پیکاں وہ تھا جب تک تری چٹکی میں تھا

جب مرے پہلو میں آ بیٹھا مرا دل ہو گیا

غرق ہو کر زیست کی کشتی ٹھکانے لگ گئی

جس کو ہم گرداب سمجھے تھے وہ ساحل ہو گیا

بخششیں تیری بہت کچھ ہیں مگر اے عشق یار

یہ بھی کیا کم ہے کہ غم سہنے کے قابل ہو گیا

دام گیسو سے رہائی اس نے دی اب اے وفاؔ

جب مرا دل خوگر طوق و سلاسل ہو گیا