hijr gham ka bayan hai goya

hijr ġham kā bayān hai goyā

yaas kī dāstān hai goyā

us ke jaur-o-sitam kā kyā kahnā

zulm meñ āsmān hai goyā

paañv phailā.e ḳhuub sote haiñ

kunj-e-marqad makān hai goyā

ruḳh se zāhir hai hāl-e-dard-e-firāq

qalb kā tarjumān hai goyā

ḳhāl-e-āriz pe yuuñ numāyāñ hai

daaġh dil kā nishān hai goyā

hijr meñ aah us gul-e-tar ke

rañg-e-ruḳh za.afrān hai goyā

dard-e-dil kyuuñ kaheñ na ham un se

jab hamārī zabān hai goyā

arsh se āmad-e-mazāmīñ hai

ye zamīn āsmān hai goyā

'barq' tum ne ġhazal ye ḳhuub kahī

lucknow kī zabān hai goyā

hijr gham ka bayan hai goya

yas ki dastan hai goya

us ke jaur-o-sitam ka kya kahna

zulm mein aasman hai goya

panw phailae KHub sote hain

kunj-e-marqad makan hai goya

ruKH se zahir hai haal-e-dard-e-firaq

qalb ka tarjuman hai goya

KHal-e-ariz pe yun numayan hai

dagh dil ka nishan hai goya

hijr mein aah us gul-e-tar ke

rang-e-ruKH zafran hai goya

dard-e-dil kyun kahen na hum un se

jab hamari zaban hai goya

arsh se aamad-e-mazamin hai

ye zamin aasman hai goya

'barq' tum ne ghazal ye KHub kahi

lucknow ki zaban hai goya