hijr hai yas hai wahshat ka saman hai main hun

hijr hai yaas hai vahshat kā samāñ hai maiñ huuñ

umr Thahre hue mausam meñ ravāñ hai maiñ huuñ

mere dāman meñ jo ganjīna-e-gul hai tū hai

tere dāman meñ jo ik barg-e-ḳhizāñ hai maiñ huuñ

az-zamīñ tā-ba-falak raat kā sannāTā hai

aise aalam meñ jo ye shor-e-fuġhāñ hai maiñ huuñ

dekh hijrāñ meñ ḳhayālāt-e-pareshāñ kā fusūñ

jā bajā aks tirā raqs-kunāñ hai maiñ huuñ

tāq-e-har-shām pe jaltī huī ummīd hai to

ye jo bujhtī huī hasrat kā dhuāñ hai maiñ huuñ

chashm-e-sad-nāz hai paikān-e-sitam hai tū hai

aur ek zaḳhm-e-jigar jān-satāñ hai maiñ huuñ

barf jazbāt kī pighlī hai mirī hiddat se

andarūñ tere jo ik shoa.la-fishāñ hai maiñ huuñ

hijr hai yas hai wahshat ka saman hai main hun

umr Thahre hue mausam mein rawan hai main hun

mere daman mein jo ganjina-e-gul hai tu hai

tere daman mein jo ek barg-e-KHizan hai main hun

az-zamin ta-ba-falak raat ka sannaTa hai

aise aalam mein jo ye shor-e-fughan hai main hun

dekh hijran mein KHayalat-e-pareshan ka fusun

ja baja aks tera raqs-kunan hai main hun

taq-e-har-sham pe jalti hui ummid hai to

ye jo bujhti hui hasrat ka dhuan hai main hun

chashm-e-sad-naz hai paikan-e-sitam hai tu hai

aur ek zaKHm-e-jigar jaan-satan hai main hun

barf jazbaat ki pighli hai meri hiddat se

andarun tere jo ek shoala-fishan hai main hun