hijr ho anjam jis ka wo visal achchha nahin

hijr ho anjām jis kā vo visāl achchhā nahīñ

kaam vo achchhā nahīñ jis kā ma.aal achchhā nahīñ

dost huuñ dushman samajhte ho samajh kā pher hai

merī nisbat aap kā aisā ḳhayāl achchhā nahīñ

roz farmāte haiñ Thahro vasl kī saa.at nahīñ

ye mahīna hai burā ye din ye saal achchhā nahīñ

jaan ruk ruk kar nikaltī hai kisī ke hijr meñ

ab marīz-e-ishq kā sunte haiñ haal achchhā nahīñ

kaam kā rahtā nahīñ jis zarf meñ aa jaa.e baal

duur kar dil se kudūrat ko malāl achchhā nahīñ

be-talab miltā hai ghar baiThe misāl-e-āsiyā

aabrū khotā hai ai saa.il savāl achchhā nahīñ

aib ai 'raushan' samajhte haiñ hunar koī hunar

nā-muvāfiq hai zamāna ab kamāl achchhā nahīñ

hijr ho anjam jis ka wo visal achchha nahin

kaam wo achchha nahin jis ka maal achchha nahin

dost hun dushman samajhte ho samajh ka pher hai

meri nisbat aap ka aisa KHayal achchha nahin

roz farmate hain Thahro wasl ki saat nahin

ye mahina hai bura ye din ye sal achchha nahin

jaan ruk ruk kar nikalti hai kisi ke hijr mein

ab mariz-e-ishq ka sunte hain haal achchha nahin

kaam ka rahta nahin jis zarf mein aa jae baal

dur kar dil se kudurat ko malal achchha nahin

be-talab milta hai ghar baiThe misal-e-asiya

aabru khota hai ai sail sawal achchha nahin

aib ai 'raushan' samajhte hain hunar koi hunar

na-muwafiq hai zamana ab kamal achchha nahin