hijr ka gham bhi nahin wasl ki parwa bhi nahin

hijr kā ġham bhī nahīñ vasl kī parvā bhī nahīñ

dil bhī pahlū meñ nahīñ dil kī tamannā bhī nahīñ

nahīñ darkār nahīñ mujh ko ġham-e-chāra-e-ġham

haañ maiñ dīvāna huuñ be-shak magar itnā bhī nahīñ

tum na sharmāo na ghabrāo maiñ kahtā bhī huuñ kuchh

zikr-e-va.ada bhī nahīñ ḳhvāhish-e-īfā bhī nahīñ

joshish-e-girya ik e.ajāz hai varna dil-e-zār

āḳhir ik buuñd hai bādal nahīñ dariyā bhī nahīñ

be-ḳhudī hashr meñ kyā yaad dilā.ūñgā use

ḳhud mujhe yaad ab us shoḳh kā va.ada bhī nahīñ

vaqt pursish hai abhī fursat-e-ehsāñ hai abhī

aa.iye maiñ abhī zinda bhī huuñ achchhā bhī nahīñ

ab kahāñ lazzat-e-ehsās-e-taraqqī 'mānī'

yaas meñ jazar-o-mad-e-dard-e-tamanna bhī nahīñ

hijr ka gham bhi nahin wasl ki parwa bhi nahin

dil bhi pahlu mein nahin dil ki tamanna bhi nahin

nahin darkar nahin mujh ko gham-e-chaara-e-gham

han main diwana hun be-shak magar itna bhi nahin

tum na sharmao na ghabrao main kahta bhi hun kuchh

zikr-e-wada bhi nahin KHwahish-e-ifa bhi nahin

joshish-e-girya ek eajaz hai warna dil-e-zar

aaKHir ek bund hai baadal nahin dariya bhi nahin

be-KHudi hashr mein kya yaad dilaunga use

KHud mujhe yaad ab us shoKH ka wada bhi nahin

waqt pursish hai abhi fursat-e-ehsan hai abhi

aaiye main abhi zinda bhi hun achchha bhi nahin

ab kahan lazzat-e-ehsas-e-taraqqi 'mani'

yas mein jazar-o-mad-e-dard-e-tamanna bhi nahin