hijr ke daur mein haalat badal jate hain

hijr ke daur meñ hālāt badal jaate haiñ

phuul mar jaate haiñ sab paat badal jaate haiñ

tū ne dekhā hai kabhī dard ke sahrāoñ meñ

dhuup baḌhne lage tab saath badal jaate haiñ

ham pe vo vaqt hai ab chāhe ḳhushī aa.e ki ġham

aañkh nam hotī hai jazbāt badal jaate haiñ

maiñ ne logoñ ko bhī mausam kā muqallid paayā

baat hotī hī nahīñ haath badal jaate haiñ

tum abhī aa.e ho tum baañT lo chāhat ke varaq

vaqt ke saath ḳhayālāt badal jaate haiñ

pahle thā bhuuk kā Dar ab hai ridā ḳhatre meñ

kyā ḳhabar thī hameñ ḳhatrāt badal jaate haiñ

ye to fitrat hai burā in ko na kahnā 'shākir'

tū ne dekhā nahīñ din raat badal jaate haiñ

hijr ke daur mein haalat badal jate hain

phul mar jate hain sab pat badal jate hain

tu ne dekha hai kabhi dard ke sahraon mein

dhup baDhne lage tab sath badal jate hain

hum pe wo waqt hai ab chahe KHushi aae ki gham

aankh nam hoti hai jazbaat badal jate hain

main ne logon ko bhi mausam ka muqallid paya

baat hoti hi nahin hath badal jate hain

tum abhi aae ho tum banT lo chahat ke waraq

waqt ke sath KHayalat badal jate hain

pahle tha bhuk ka Dar ab hai rida KHatre mein

kya KHabar thi hamein KHatraat badal jate hain

ye to fitrat hai bura in ko na kahna 'shakir'

tu ne dekha nahin din raat badal jate hain