hijr ki raat hai isko shab-e-matam na bana

hijr kī raat hai is ko shab-e-mātam na banā

vasl lamhoñ ko sajā zamzama-e-ġham na banā

kirchiyāñ TuuT ke bikhrī haiñ tire chāroñ-taraf

reza-e-dil ko uThā zaḳhm kā marham na banā

gar bichhaḌnā hai to ik faisla kar lete haiñ

is ko taqdīr samajh dard kā mausam na banā

saare sapne bahā le jā.eñge aañsū tere

nīm-ḳhvāb āñkhoñ ko tū dīda-e-pur-nam na banā

ai musavvir tire in hāthoñ meñ larzish kyuuñ hai

rang tasvīr meñ bhar le use maddham na banā

har musāfir meñ ta.alluq ho zarūrī to nahīñ

un kā dukh-dard samajh pyaar kā sangam na banā

ab to yādoñ ke sivā kuchh nahīñ 'shahnāz' ke paas

apnī āvāz dabā ik nayā sargam na banā

hijr ki raat hai is ko shab-e-matam na bana

wasl lamhon ko saja zamzama-e-gham na bana

kirchiyan TuT ke bikhri hain tere chaaron-taraf

reza-e-dil ko uTha zaKHm ka marham na bana

gar bichhaDna hai to ek faisla kar lete hain

is ko taqdir samajh dard ka mausam na bana

sare sapne baha le jaenge aansu tere

nim-KHwab aankhon ko tu dida-e-pur-nam na bana

ai musawwir tere in hathon mein larzish kyun hai

rang taswir mein bhar le use maddham na bana

har musafir mein talluq ho zaruri to nahin

un ka dukh-dard samajh pyar ka sangam na bana

ab to yaadon ke siwa kuchh nahin 'shahnaz' ke pas

apni aawaz daba ek naya sargam na bana