hijr ki raat meri jaan pe bani ho jaise

hijr kī raat mirī jaañ pe banī ho jaise

dil meñ ik yaad ki neze kī anī ho jaise

nahīñ ma.alūm ki maiñ kaun huuñ manzil hai kahāñ

chādar-e-ḳhāk har ik samt tanī ho jaise

apnī āvāz ko ḳhud sun ke laraz jaatā huuñ

kisī saa.e se mirī ham-suḳhanī ho jaise

hādsa ek magar kitne ġhamoñ kā ehsās

ek sūrat ka.ī rañgoñ se banī ho jaise

bhuul kar bhī koī letā nahīñ ab nām-e-vafā

ishq is shahr meñ gardan-zadanī ho jaise

kitne ārām se huuñ ars-e-tanhā.ī meñ

gosha-e-dasht meñ bhī chhāñv ghanī ho jaise

kis qadar narm o dil-āvez hai ye garm sahar

dhuup mahtāb kī chādar meñ chhanī ho jaise

kabhī siine se bhī phūloñ kī mahak aatī hai

dil meñ bhī koī fazā-e-chamanī ho jaise

jism vo jism ki lapkā huā kauñdā koī

hoñT vo hoñT ki la.al-e-yamanī ho jaise

dil meñ chubhtī bhī rahī aañkh meñ khubtī bhī rahī

mizha-e-tez ki hiire kī kanī ho jaise

ḳhud hī tasvīr banātā huuñ miTā detā huuñ

but-garī mere liye but-shikanī ho jaise

kam nahīñ himmat-e-farhād se sa.ī-e-taḳhlīq

kisī shīrīñ ke liye koh-kanī ho jaise

mahfil-e-dost kī raunaq meñ haiñ 'shahzād' magar

dil kā ye haal ġharīb-ul-vatanī ho jaise

hijr ki raat meri jaan pe bani ho jaise

dil mein ek yaad ki neze ki ani ho jaise

nahin malum ki main kaun hun manzil hai kahan

chadar-e-KHak har ek samt tani ho jaise

apni aawaz ko KHud sun ke laraz jata hun

kisi sae se meri ham-suKHani ho jaise

hadsa ek magar kitne ghamon ka ehsas

ek surat kai rangon se bani ho jaise

bhul kar bhi koi leta nahin ab nam-e-wafa

ishq is shahr mein gardan-zadani ho jaise

kitne aaram se hun ars-e-tanhai mein

gosha-e-dasht mein bhi chhanw ghani ho jaise

kis qadar narm o dil-awez hai ye garm sahar

dhup mahtab ki chadar mein chhani ho jaise

kabhi sine se bhi phulon ki mahak aati hai

dil mein bhi koi faza-e-chamani ho jaise

jism wo jism ki lapka hua kaunda koi

honT wo honT ki lal-e-yamani ho jaise

dil mein chubhti bhi rahi aankh mein khubti bhi rahi

mizha-e-tez ki hire ki kani ho jaise

KHud hi taswir banata hun miTa deta hun

but-gari mere liye but-shikani ho jaise

kam nahin himmat-e-farhad se sai-e-taKHliq

kisi shirin ke liye koh-kani ho jaise

mahfil-e-dost ki raunaq mein hain 'shahzad' magar

dil ka ye haal gharib-ul-watani ho jaise