ہجر میں وصل کے امکان بنا سکتے ہیں

ہجر میں وصل کے امکان بنا سکتے ہیں

خود کو ڈھونڈیں تو تری ذات کو پا سکتے ہیں

گر کوئی ہم سے کہے شعر سنا اس پر تو

ایک ہی سانس میں دیوان سنا سکتے ہیں

اس محبت میں اذیت ہے کئی برسوں کی

آپ چاہیں تو ابھی چھوڑ کے جا سکتے ہیں

دل کسی بات پہ ہوتا نہیں مائل بہ کرم

سوچ لیجے کسی پتھر سے نبھا سکتے ہیں

آپ لگتے ہیں مسافر مجھے آسانی کے

ساتھ چلنے میں ہو مشکل تو بتا سکتے ہیں

زندگی میں نہیں کرتے ہیں مداوا غم کا

ہم جنازوں کو ہی کندھوں پہ اٹھا سکتے ہیں

کرنے آئے ہیں ازالہ مرے دکھ کا لیکن

وقت جو بیت گیا موڑ کے لا سکتے ہیں