hijr mein wasl ke imkan bana sakte hain

hijr meñ vasl ke imkān banā sakte haiñ

ḳhud ko DhūñDeñ to tirī zaat ko pā sakte haiñ

gar koī ham se kahe she'r sunā us par to

ek hī saañs meñ dīvān sunā sakte haiñ

is mohabbat meñ aziyyat hai ka.ī barsoñ kī

aap chāheñ to abhī chhoḌ ke jā sakte haiñ

dil kisī baat pe hotā nahīñ mā.il-ba-karam

soch liije kisī patthar se nibhā sakte haiñ

aap lagte haiñ musāfir mujhe āsānī ke

saath chalne meñ ho mushkil to batā sakte haiñ

zindagī meñ nahīñ karte haiñ mudāvā ġham kā

ham janāzoñ ko hī kandhoñ pe uThā sakte haiñ

karne aa.e haiñ izāla mire dukh kā lekin

vaqt jo biit gayā moḌ ke lā sakte haiñ

hijr mein wasl ke imkan bana sakte hain

KHud ko DhunDen to teri zat ko pa sakte hain

gar koi hum se kahe she'r suna us par to

ek hi sans mein diwan suna sakte hain

is mohabbat mein aziyyat hai kai barson ki

aap chahen to abhi chhoD ke ja sakte hain

dil kisi baat pe hota nahin mail-ba-karam

soch lije kisi patthar se nibha sakte hain

aap lagte hain musafir mujhe aasani ke

sath chalne mein ho mushkil to bata sakte hain

zindagi mein nahin karte hain mudawa gham ka

hum janazon ko hi kandhon pe uTha sakte hain

karne aae hain izala mere dukh ka lekin

waqt jo bit gaya moD ke la sakte hain