hijr-o-gham mein apni aankh galani paDti hai

hijr-o-ġham meñ apnī aañkh galānī paḌtī hai

yā'nī apne dil kī baat batānī paḌtī hai

kaun 'ishq kar ke duniyā meñ ḳhush rah paatā hai

bas ḳhush rahne kī har rasm nibhānī paḌtī hai

haa.e kisī ko kho kar jiine kī majbūrī meñ

saañs ḳhud-ba-ḳhud kab chaltī hai chalānī paḌtī hai

baaqī rastoñ ke naqshe haiñ so manzil bhī hai

'ishq meñ lekin ḳhud kī raah banānī paḌtī hai

kaalī rāteñ rātoñ meñ ġham aur ġham meñ ham ko

behtar din kī ḳhātir raat bhulānī paḌtī hai

ġham de kar kuchh log chain se so lete hoñge

kuchh logoñ ko apnī niiñd gañvānī paḌtī hai

dil ke daure dene vaalī yā phir aañsū meñ

uljhāne vaalī har yaad miTānī paḌtī hai

hijr-o-gham mein apni aankh galani paDti hai

ya'ni apne dil ki baat batani paDti hai

kaun 'ishq kar ke duniya mein KHush rah pata hai

bas KHush rahne ki har rasm nibhani paDti hai

hae kisi ko kho kar jine ki majburi mein

sans KHud-ba-KHud kab chalti hai chalani paDti hai

baqi raston ke naqshe hain so manzil bhi hai

'ishq mein lekin KHud ki rah banani paDti hai

kali raaten raaton mein gham aur gham mein hum ko

behtar din ki KHatir raat bhulani paDti hai

gham de kar kuchh log chain se so lete honge

kuchh logon ko apni nind ganwani paDti hai

dil ke daure dene wali ya phir aansu mein

uljhane wali har yaad miTani paDti hai