ہجر سے دشت کو آباد نہیں رکھوں گا

ہجر سے دشت کو آباد نہیں رکھوں گا

عشق میں قیس کو استاد نہیں رکھوں گا

دوسری بار اگر بھیجا گیا دنیا میں

آنکھ اور سوچ کو آزاد نہیں رکھوں گا

خود سے رشتہ ہے مرا صرف ترے ہونے تک

یہ تعلق بھی ترے بعد نہیں رکھوں گا

تو نے ڈالا نہیں تاریخ میں کردار مرا

رفتگانی میں تجھے یاد نہیں رکھوں گا

تیری دہلیز بھی چوموں گا تو خودداری سے

ہونٹ رکھتے ہوئے فریاد نہیں رکھوں گا

تجھ کو چاہوں گا ترے سارے پرستاروں سمیت

وہم پر عشق کی بنیاد نہیں رکھوں گا