ہجر طاری ہے مگر حشر بپا چاہتا ہوں

ہجر طاری ہے مگر حشر بپا چاہتا ہوں

میں تجھے جان نہیں جاں سے سوا چاہتا ہوں

آپ کہتے ہیں زمانے کی طرح جینے کو

میں تو مرنا بھی زمانے سے جدا چاہتا ہوں

ایک مصرع مجھے مبہم نہیں اچھا لگتا

میں ہر اک شعر کا مضمون کھلا چاہتا ہوں

شکریہ اپنی عنایت کو اٹھا کر رکھیں

خوب دولت ہے مرے پاس دعا چاہتا ہوں

تھوڑا تھوڑا میں کہاں تک رہوں ہو کر سب کا

اب کسی ایک کے سینے سے لگا چاہتا ہوں

داد پانے کی توقع نہیں رہتی مجھ کو

ہاں مگر شعر توجہ سے سنا چاہتا ہوں