hijr-zada aaankhon se jab aansu nikle KHamoshi se

hijr-zada ā.ankhoñ se jab aañsū nikle ḳhāmoshī se

kisī ne samjhā raat samay do diip jale ḳhāmoshī se

maiñ bhī aag lagā saktā huuñ is barsāt ke mausam meñ

thoḌī duur talak vo mere saath chale ḳhāmoshī se

shaam kī dhīmī aañch meñ jab ḳhurshīd nahā kar so jaa.e

manzar aapas meñ milte haiñ ḳhuub gale ḳhāmoshī se

barf kī parteñ jab bhī dekhūñ maiñ ūñchī dīvāroñ par

jism sulagne lagtā hai aur dil pighle ḳhāmoshī se

chāhat ke phir phuul khileñge aap kī ye ḳhush-fahmī hai

kapḌe mere sāmne mausam ne badle ḳhāmoshī se

din ke ujāloñ meñ shāyad maiñ ḳhud se bichhḌā rahtā huuñ

raat kī tārīkī meñ ik ḳhvāhish machle ḳhāmoshī se

jab bhī nādīda sapnoñ ne man āñgan meñ raqs kiyā

terī yaad ke jugnū chamke raat Dhale ḳhāmoshī se

mulk-e-suḳhan ke shahzādoñ kī saf meñ khaḌā ho jā.egā

gar tire lahje kī dhaḌkan ḳhushbū ugle ḳhāmoshī se

hijr-zada aaankhon se jab aansu nikle KHamoshi se

kisi ne samjha raat samay do dip jale KHamoshi se

main bhi aag laga sakta hun is barsat ke mausam mein

thoDi dur talak wo mere sath chale KHamoshi se

sham ki dhimi aanch mein jab KHurshid naha kar so jae

manzar aapas mein milte hain KHub gale KHamoshi se

barf ki parten jab bhi dekhun main unchi diwaron par

jism sulagne lagta hai aur dil pighle KHamoshi se

chahat ke phir phul khilenge aap ki ye KHush-fahmi hai

kapDe mere samne mausam ne badle KHamoshi se

din ke ujalon mein shayad main KHud se bichhDa rahta hun

raat ki tariki mein ek KHwahish machle KHamoshi se

jab bhi nadida sapnon ne man aangan mein raqs kiya

teri yaad ke jugnu chamke raat Dhale KHamoshi se

mulk-e-suKHan ke shahzadon ki saf mein khaDa ho jaega

gar tere lahje ki dhaDkan KHushbu ugle KHamoshi se