hijrat bhi wahi naql-e-makani bhi wahi hai

hijrat bhī vahī naql-e-makānī bhī vahī hai

ham ḳhāna-ba-doshoñ kī kahānī bhī vahī hai

ye shā.irī karnā koī āsān hai yaaro

jo baat chhupānī hai batānī bhī vahī hai

kamre meñ tire hijr ke jaale bhī vahī haiñ

dīvār pe tasvīr purānī bhī vahī hai

ghar bhī hai abhī tak tirī ḳhushbū se mo.attar

āñgan meñ mire raat kī raanī bhī vahī hai

āñkhoñ meñ tirā aks liye peḌ khaḌe haiñ

rasta ye vahī hai ye nishānī bhī vahī hai

badlā nahīñ kuchh bhī hai vahī dasht-navardī

aur ishq ke dariyā kī ravānī bhī vahī hai

mahfil meñ tujhe dekh ke ḳhāmosh huā huuñ

varna to mirī zūd-bayānī bhī vahī hai

ik shaḳhs ne kyā mujh ko ḳharīdā ki 'sahar' maiñ

arzāñ huā aisā ki girānī bhī vahī hai

hijrat bhi wahi naql-e-makani bhi wahi hai

hum KHana-ba-doshon ki kahani bhi wahi hai

ye shairi karna koi aasan hai yaro

jo baat chhupani hai batani bhi wahi hai

kamre mein tere hijr ke jale bhi wahi hain

diwar pe taswir purani bhi wahi hai

ghar bhi hai abhi tak teri KHushbu se moattar

aangan mein mere raat ki rani bhi wahi hai

aankhon mein tera aks liye peD khaDe hain

rasta ye wahi hai ye nishani bhi wahi hai

badla nahin kuchh bhi hai wahi dasht-nawardi

aur ishq ke dariya ki rawani bhi wahi hai

mahfil mein tujhe dekh ke KHamosh hua hun

warna to meri zud-bayani bhi wahi hai

ek shaKHs ne kya mujh ko KHarida ki 'sahar' main

arzan hua aisa ki girani bhi wahi hai