hikayat-e-husn-e-yar likhna hadis-e-mina-o-jam kahna

hikāyat-e-husn-e-yār likhnā hadīs-e-mīnā-o-jām kahnā

abhī vahī kār-e-āshiqāñ hai sukūt-e-ġham kā kalām kahnā

ufuq taġhayyur kī tez lau se pighal rahā hai badal rahā hai

magar is ahvāl-e-vāqa.ī ko likheñ na vo mere naam kahnā

hazār hāthoñ se maiñ ne jis ko sambhāl rakkhā thā zindagī meñ

charāġh-bar-kaf bisāt-e-dil par khaḌī huī hai vo shaam kahnā

agar tirī āstīn-e-tar ko ḳhabar nahīñ dāstān-e-ġham kī

zamāna unvān-e-tāza-tar se sunā gayā nā-tamām kahnā

dhoveñ meñ ik tā.ir-e-navā-gar ne ātish-e-gul pe jaan de dī

rag-e-gulū meñ jalī huī lai chamak ga.ī zer-e-dām kahnā

ham aise jāda-tarāz-e-sahrā nikal hī aate haiñ chand āḳhir

suḳhan ko uslūb-e-zindagī kā diyā hai ham ne hī naam kahnā

kabhī kabhī to lahak sā uThtā hai barq-o-bārāñ kī chashmakoñ meñ

kisī adā-e-visāl-sāmāñ kā ḳhanjar-e-be-niyām kahnā

utar gayā dil meñ zahr-e-kākul nisār ik sarv-e-dil-satāñ ke

fusūn-e-chāra-garī se guzrā mohabbatoñ kā payām kahnā

ḳhayāl-e-yārān-e-kū-ba-kū se nazar hai ik mātam-e-nazāra

dam-e-harīfān-e-be-subū se nafas hai be-nañg-o-nām kahnā

abhī to kuchh log zindagī meñ hazār sāyoñ kā ik shajar haiñ

unhīñ ke sāyoñ meñ qāfile kuchh Thahar ga.e be-qayām kahnā

ḳhudā tujhe āfiyat kī ābādiyoñ meñ nauras safīr rakkhe

udhar ke dīvār-o-dar salāmat mirī taraf se salām kahnā

hikayat-e-husn-e-yar likhna hadis-e-mina-o-jam kahna

abhi wahi kar-e-ashiqan hai sukut-e-gham ka kalam kahna

ufuq taghayyur ki tez lau se pighal raha hai badal raha hai

magar is ahwal-e-waqai ko likhen na wo mere nam kahna

hazar hathon se main ne jis ko sambhaal rakkha tha zindagi mein

charagh-bar-kaf bisat-e-dil par khaDi hui hai wo sham kahna

agar teri aastin-e-tar ko KHabar nahin dastan-e-gham ki

zamana unwan-e-taza-tar se suna gaya na-tamam kahna

dhowen mein ek tair-e-nawa-gar ne aatish-e-gul pe jaan de di

rag-e-gulu mein jali hui lai chamak gai zer-e-dam kahna

hum aise jada-taraaz-e-sahra nikal hi aate hain chand aaKHir

suKHan ko uslub-e-zindagi ka diya hai hum ne hi nam kahna

kabhi kabhi to lahak sa uThta hai barq-o-baran ki chashmakon mein

kisi ada-e-visal-saman ka KHanjar-e-be-niyam kahna

utar gaya dil mein zahr-e-kakul nisar ek sarw-e-dil-satan ke

fusun-e-chaara-gari se guzra mohabbaton ka payam kahna

KHayal-e-yaran-e-ku-ba-ku se nazar hai ek matam-e-nazara

dam-e-harifan-e-be-subu se nafas hai be-nang-o-nam kahna

abhi to kuchh log zindagi mein hazar sayon ka ek shajar hain

unhin ke sayon mein qafile kuchh Thahar gae be-qayam kahna

KHuda tujhe aafiyat ki aabaadiyon mein nauras safir rakkhe

udhar ke diwar-o-dar salamat meri taraf se salam kahna