hilti hai zulf jumbish-e-gardan ke sath sath

hiltī hai zulf jumbish-e-gardan ke saath saath

nāgin bhī hai lagī huī rahzan ke saath saath

kis kī kudūratoñ se ye miTTī ḳharāb hai

kis kā ġhubār hai tire dāman ke saath saath

uTThā thā muñh chhupā.e hue maiñ hī sub.h ko

jaatā thā maiñ hī raat ko dushman ke saath saath

kūche meñ us sanam ke ḳhudā.ī kā lutf hai

nāhaq phirā maiñ shaiḳh o brahman ke saath saath

dil kī tapish ne ḳhaak uḌaa.ī ye bā'd-e-marg

lāsha phirā kiyā mirā madfan ke saath saath

allāh apne rashk kā darja bhī ab nahīñ

kis kis jagah gayā but-e-pur-fan ke saath saath

jhoñkā qafas meñ aayā jo bād-e-bahār kā

pahlū se dil nikal chalā san-san ke saath saath

ashkoñ ke saath saath to maujeñ ġhamoñ kī haiñ

āñkhoñ ke sho'le haiñ mire shevan ke saath saath

jis raah se guzarte haiñ vo, mujh se saikḌoñ

ho lete haiñ junūñ-zada ban ban ke saath saath

zanjīr mere paañv ke pīchhe paḌī hai yuuñ

phirtā hai rishta jis tarah sozan ke saath saath

kab tak kisī ko kholeñ kisī ko kareñ vo band

phirtī hai yaañ nigāh to rauzan ke saath saath

yuuñ saath ruuh ke hai tan-e-zār ab 'nizām'

phirtā hai jaise saaya mirā tan ke saath saath

hilti hai zulf jumbish-e-gardan ke sath sath

nagin bhi hai lagi hui rahzan ke sath sath

kis ki kuduraton se ye miTTi KHarab hai

kis ka ghubar hai tere daman ke sath sath

uTTha tha munh chhupae hue main hi subh ko

jata tha main hi raat ko dushman ke sath sath

kuche mein us sanam ke KHudai ka lutf hai

nahaq phira main shaiKH o brahman ke sath sath

dil ki tapish ne KHak uDai ye ba'd-e-marg

lasha phira kiya mera madfan ke sath sath

allah apne rashk ka darja bhi ab nahin

kis kis jagah gaya but-e-pur-fan ke sath sath

jhonka qafas mein aaya jo baad-e-bahaar ka

pahlu se dil nikal chala san-san ke sath sath

ashkon ke sath sath to maujen ghamon ki hain

aankhon ke sho'le hain mere shewan ke sath sath

jis rah se guzarte hain wo, mujh se saikDon

ho lete hain junun-zada ban ban ke sath sath

zanjir mere panw ke pichhe paDi hai yun

phirta hai rishta jis tarah sozan ke sath sath

kab tak kisi ko kholen kisi ko karen wo band

phirti hai yan nigah to rauzan ke sath sath

yun sath ruh ke hai tan-e-zar ab 'nizam'

phirta hai jaise saya mera tan ke sath sath