hina ka rang lahu sa libas ya-allah

hinā kā rang lahū sā libās yā-allāh

ajiib vahm ajab iltibās yā-allāh

vafā kā aur batā maiñ subūt kyā detā

bujhā ke ḳhuun se dhartī kī pyaas yā-allāh

tire ḳhayāl se hijrat tire visāl kī aas

kitāb-e-dil kā kaThin iqtibās yā-allāh

mujhe diyā to hai tārīk rāstoñ kā safar

atā ho dil bhī qayāfa-shanās yā-allāh

na koī jhiil na naddī na os kī būñdeñ

jalā na de kahīñ sahrā kī pyaas yā-allāh

vo pahlī pahlī sī bārish vo apnā kachchā ghar

vo soñdhī soñdhī sī miTTī kī baas yā-allāh

use bhī kaash mohabbat kī badduā de jaa.e

faqīr koī darīda libās yā-allāh

junūñ ke haath meñ hai atomī bamoñ kī kalīd

falak udaas zamīñ bad-havās yā-allāh

gunāhgār hai 'bazmī' kā be-libās badan

magar rahe tirī rahmat kā paas yā-allāh

hina ka rang lahu sa libas ya-allah

ajib wahm ajab iltibas ya-allah

wafa ka aur bata main subut kya deta

bujha ke KHun se dharti ki pyas ya-allah

tere KHayal se hijrat tere visal ki aas

kitab-e-dil ka kaThin iqtibas ya-allah

mujhe diya to hai tarik raston ka safar

ata ho dil bhi qayafa-shanas ya-allah

na koi jhil na naddi na os ki bunden

jala na de kahin sahra ki pyas ya-allah

wo pahli pahli si barish wo apna kachcha ghar

wo sondhi sondhi si miTTi ki bas ya-allah

use bhi kash mohabbat ki baddua de jae

faqir koi darida libas ya-allah

junun ke hath mein hai atomi bamon ki kalid

falak udas zamin bad-hawas ya-allah

gunahgar hai 'bazmi' ka be-libas badan

magar rahe teri rahmat ka pas ya-allah