hina ye kahti hai lo be-zaban pa ke mujhe

hinā ye kahtī hai lo be-zabān pā ke mujhe

jab aa.e aap ga.e choriyāñ lagā ke mujhe

na dekhte the kabhī jo nazar uThā ke mujhe

vo dekhte haiñ dam-e-hashr muskurā ke mujhe

hinā ye kahtī hai un se sunā sunā ke mujhe

nahīñ shahīdoñ meñ milnā lahū lagā ke mujhe

nigah se baḌh ke haiñ gustāḳh dast-e-shauq mire

na kosiyegā zarā haath uThā uThā ke mujhe

mirā raqīb mujhī sā rakhā diyā mujh ko

nikālī chheḌ kī shakl aa.ina dikhā ke mujhe

duhā.iyāñ haiñ shab-e-vasl apnī shoḳhī se

ki luuTe lete haiñ joban hasīn pā ke mujhe

zarā se dard ne Dhaa.ī haiñ āfateñ kyā kyā

paTak diyā hai zamīñ par uThā uThā ke mujhe

kahā jo un se charāġh-e-lahad jalāte jaao

havā se tez ga.e vo havā batā ke mujhe

kanār-e-ġhair meñ rāteñ taḌap taḌap ke kaTīñ

rahe na chain se vo qabr meñ sulā ke mujhe

sabā na daaġh lagā tū ye apne dāman ko

kahegī sham-e-lahad kyā milā bujhā ke mujhe

maiñ apne ḳhuun kā beḌā uThā.ūñ ḳhud kyūñkar

vo paan dete haiñ shoḳhī se muskurā ke mujhe

urūs-e-gor ke pahlū meñ chain pā.ūñgā

vahī sulā.egī āġhosh meñ dabā ke mujhe

kahā thā kis ne ki lākhoñ ke dil karo pāmāl

jo kah rahe ho ki laale paḌe hinā ke mujhe

nikāl dūñgā shab-e-vasl bal nazākat ke

Darā liyā hai bahut tevriyāñ chaḌhā ke mujhe

manā liyā tire rūThe hue ko zālim ne

hañsā diyā tire nāvak ne gudgudā ke mujhe

ye haath bāñdh ke kahtā hai dil ke zaḳhm kā chor

huzūr yaad haiñ sab hathkañDe hinā ke mujhe

vo aa ke sharm se kahte haiñ merī turbat par

na dekhe sabza-e-ḳhvābīda sar uThā ke mujhe

ye kyā mazāq farishtoñ ko aaj sūjhā hai

hujūm-e-hashr meñ le aa.e haiñ bulā ke mujhe

miTe huoñ ke miTāne ko ye bhī āñdhī haiñ

raheñge naqsh-e-qadam ḳhaak meñ milā ke mujhe

kahūñgā hashr ke chhoTe se din meñ kyā kyā baat

bahut hī hausle haiñ arz-e-mudda.ā ke mujhe

qayāmat aur qayāmat meñ aa.ī qahr huā

butoñ ne chheḌ diyā sāmne ḳhudā ke mujhe

adā-shanāsoñ ko marte bhī ban nahīñ paḌtī

payām aate haiñ kab se mirī qazā ke mujhe

satāne vaalo qayāmat bhī aa.ī jaatī hai

jafā ke lutf tumhīñ ā.eñge vafā ke mujhe

tamām umr ke shikve miTā.e jaate haiñ

vo dekhte haiñ dam-e-naz.a muskurā ke mujhe

kahāñ vo nuur kī sūrat vo nuur kī āvāz

'riyāz' kaun sunā.e ġhazal ye gā ke mujhe

hina ye kahti hai lo be-zaban pa ke mujhe

jab aae aap gae choriyan laga ke mujhe

na dekhte the kabhi jo nazar uTha ke mujhe

wo dekhte hain dam-e-hashr muskura ke mujhe

hina ye kahti hai un se suna suna ke mujhe

nahin shahidon mein milna lahu laga ke mujhe

nigah se baDh ke hain gustaKH dast-e-shauq mere

na kosiyega zara hath uTha uTha ke mujhe

mera raqib mujhi sa rakha diya mujh ko

nikali chheD ki shakl aaina dikha ke mujhe

duhaiyan hain shab-e-wasl apni shoKHi se

ki luTe lete hain joban hasin pa ke mujhe

zara se dard ne Dhai hain aafaten kya kya

paTak diya hai zamin par uTha uTha ke mujhe

kaha jo un se charagh-e-lahad jalate jao

hawa se tez gae wo hawa bata ke mujhe

kanar-e-ghair mein raaten taDap taDap ke kaTin

rahe na chain se wo qabr mein sula ke mujhe

saba na dagh laga tu ye apne daman ko

kahegi sham-e-lahad kya mila bujha ke mujhe

main apne KHun ka beDa uThaun KHud kyunkar

wo pan dete hain shoKHi se muskura ke mujhe

urus-e-gor ke pahlu mein chain paunga

wahi sulaegi aaghosh mein daba ke mujhe

kaha tha kis ne ki lakhon ke dil karo pamal

jo kah rahe ho ki lale paDe hina ke mujhe

nikal dunga shab-e-wasl bal nazakat ke

Dara liya hai bahut tewriyan chaDha ke mujhe

mana liya tere ruThe hue ko zalim ne

hansa diya tere nawak ne gudguda ke mujhe

ye hath bandh ke kahta hai dil ke zaKHm ka chor

huzur yaad hain sab hathkanDe hina ke mujhe

wo aa ke sharm se kahte hain meri turbat par

na dekhe sabza-e-KHwabida sar uTha ke mujhe

ye kya mazaq farishton ko aaj sujha hai

hujum-e-hashr mein le aae hain bula ke mujhe

miTe huon ke miTane ko ye bhi aandhi hain

rahenge naqsh-e-qadam KHak mein mila ke mujhe

kahunga hashr ke chhoTe se din mein kya kya baat

bahut hi hausle hain arz-e-muddaa ke mujhe

qayamat aur qayamat mein aai qahr hua

buton ne chheD diya samne KHuda ke mujhe

ada-shanason ko marte bhi ban nahin paDti

payam aate hain kab se meri qaza ke mujhe

satane walo qayamat bhi aai jati hai

jafa ke lutf tumhin aaenge wafa ke mujhe

tamam umr ke shikwe miTae jate hain

wo dekhte hain dam-e-naza muskura ke mujhe

kahan wo nur ki surat wo nur ki aawaz

'riyaz' kaun sunae ghazal ye ga ke mujhe