hindu hai kaun shakl-e-musalman mein kaun hai

hindū hai kaun shakl-e-musalmāñ meñ kaun hai

haivāñ hai kaun sūrat-e-insāñ meñ kaun hai

sahrā meñ kaun koh-o-bayābāñ meñ kaun hai

gulshan meñ kaun bāġh-e-gulistāñ meñ kaun hai

sūrat judā hai sab kī magar ek hī vajūd

gul meñ hai kaun ḳhār-e-muġhīlāñ meñ kaun hai

āshiq ko ġham nasīb hai māshūq ko ḳhushī

bulbul meñ kaun hai gul-e-ḳhandāñ meñ kaun hai

ye kis kī chashm-e-yār haiñ vo aks-e-zulf-e-yār

sumbul meñ kaun nargis-e-hairāñ meñ kaun hai

suufī hai koī bā-safā aur koī bāda-nosh

masjid meñ kaun mahfil-e-rindāñ meñ kaun hai

'ḳhāmosh' dekh arz-o-samā meñ hai kis kā nuur

sūraj meñ kaun māh-e-daraḳhshāñ meñ kaun hai

hindu hai kaun shakl-e-musalman mein kaun hai

haiwan hai kaun surat-e-insan mein kaun hai

sahra mein kaun koh-o-bayaban mein kaun hai

gulshan mein kaun bagh-e-gulistan mein kaun hai

surat juda hai sab ki magar ek hi wajud

gul mein hai kaun KHar-e-mughilan mein kaun hai

aashiq ko gham nasib hai mashuq ko KHushi

bulbul mein kaun hai gul-e-KHandan mein kaun hai

ye kis ki chashm-e-yar hain wo aks-e-zulf-e-yar

sumbul mein kaun nargis-e-hairan mein kaun hai

sufi hai koi ba-safa aur koi baada-nosh

masjid mein kaun mahfil-e-rindan mein kaun hai

'KHamosh' dekh arz-o-sama mein hai kis ka nur

suraj mein kaun mah-e-daraKHshan mein kaun hai