hindu na ban saka main musalman na ban saka

hindū na ban sakā maiñ musalmāñ na ban sakā

giitā sunī na hāfiz-e-qurāñ na ban sakā

maiñ dard-e-sar to ban gayā har ek ke liye

lekin kisī ke dard kā darmāñ na ban sakā

masnad-nashīñ na ban sakā ye aur baat thī

sad haif tere dar kā bhī darbāñ na ban sakā

ḳhud meñ samā ke ḳhud ko hī kartā rahā salām

apne sivā kisī kā sanā-ḳhvāñ na ban sakā

kitne hī shād-kām bashar se ḳhudā hue

maiñ bad-nasīb aaj tak insāñ na ban sakā

kāñTā to ban gayā maiñ kisī ḳhārzār meñ

lekin kabhī gul-e-chamanistāñ na ban sakā

sher-o-suḳhan meñ yuuñ to guzārī tamām umr

is par bhī 'āzam' ek suḳhan-dāñ na ban sakā

hindu na ban saka main musalman na ban saka

gita suni na hafiz-e-quran na ban saka

main dard-e-sar to ban gaya har ek ke liye

lekin kisi ke dard ka darman na ban saka

masnad-nashin na ban saka ye aur baat thi

sad haif tere dar ka bhi darban na ban saka

KHud mein sama ke KHud ko hi karta raha salam

apne siwa kisi ka sana-KHwan na ban saka

kitne hi shad-kaam bashar se KHuda hue

main bad-nasib aaj tak insan na ban saka

kanTa to ban gaya main kisi KHarzar mein

lekin kabhi gul-e-chamanistan na ban saka

sher-o-suKHan mein yun to guzari tamam umr

is par bhi 'azam' ek suKHan-dan na ban saka