hirs-e-dua na ho hawas-e-iltija na ho

hirs-e-duā na ho havas-e-iltijā na ho

ulfat kā jab maza hai koī mudda.ā na ho

tū un kī bevafā.ī pe shikva-sarā na ho

qadr-e-vafā na ho vo agar bevafā na ho

tasvīr ban ke dekh ba-ādāb-e-dīd unheñ

jumbish na ho nigāh ko dil boltā na ho

āsūdagān-e-aish batā.eñ vo kyā kare

jis ko ba-qadr-e-hausla ġham bhī milā na ho

ai be-ḳhudī ḳhudī kī taraf aañkh pher de

dekheñ kahīñ hijāb-e-ḳhudī meñ ḳhudā na ho

is vaqt shāyad un kā patā mil sake tujhe

jab terā apnī hastī kī had tak patā na ho

iz.hār-e-mudda.ā ho 'shifā' is adā ke saath

dast-e-duā bhī vāqif-e-nafs-e-duā na ho

hirs-e-dua na ho hawas-e-iltija na ho

ulfat ka jab maza hai koi muddaa na ho

tu un ki bewafai pe shikwa-sara na ho

qadr-e-wafa na ho wo agar bewafa na ho

taswir ban ke dekh ba-adab-e-did unhen

jumbish na ho nigah ko dil bolta na ho

aasudagan-e-aish bataen wo kya kare

jis ko ba-qadr-e-hausla gham bhi mila na ho

ai be-KHudi KHudi ki taraf aankh pher de

dekhen kahin hijab-e-KHudi mein KHuda na ho

is waqt shayad un ka pata mil sake tujhe

jab tera apni hasti ki had tak pata na ho

izhaar-e-muddaa ho 'shifa' is ada ke sath

dast-e-dua bhi waqif-e-nafs-e-dua na ho