his nahin taDap nahin bab-e-ata bhi kyun khule

his nahīñ taḌap nahīñ bāb-e-atā bhī kyuuñ khule

ham haiñ girafta-dil abhī ham se sabā bhī kyuuñ khule

ab ye udaas din hameñ saath liye liye phire

ḳhvāb bujhe to kyā rahā kaalī ghaTā bhī kyuuñ khule

dil kā koī ziyāñ nahīñ jaañ kā mo.āmla nahīñ

haath meñ ik diyā nahīñ mauj-e-havā bhī kyuuñ khule

yaañ kisī rahguzar pe kuchh naqsh-e-qadam paḌe rahe

qāsid-e-ḳhush-ḳhabar nahīñ shahr-e-sabā bhī kyuuñ khule

umr tamām kaaT dī hasrat-e-kāḳh-o-kū liye

mere tumhāre sāmne arz-o-samā bhī kyuuñ khule

kūza-ba-kūza baT ga.iiñ jitnī bhī thiiñ sadāqateñ

ḳhālī hatheliyoñ pe ab harf-e-duā bhī kyuuñ khule

shiddat-e-raqs-e-ārzū apnā javāz aap thī

merī nigāh par 'adā' merī ḳhatā bhī kyuuñ khule

his nahin taDap nahin bab-e-ata bhi kyun khule

hum hain girafta-dil abhi hum se saba bhi kyun khule

ab ye udas din hamein sath liye liye phire

KHwab bujhe to kya raha kali ghaTa bhi kyun khule

dil ka koi ziyan nahin jaan ka moamla nahin

hath mein ek diya nahin mauj-e-hawa bhi kyun khule

yan kisi rahguzar pe kuchh naqsh-e-qadam paDe rahe

qasid-e-KHush-KHabar nahin shahr-e-saba bhi kyun khule

umr tamam kaT di hasrat-e-kaKH-o-ku liye

mere tumhaare samne arz-o-sama bhi kyun khule

kuza-ba-kuza baT gain jitni bhi thin sadaqaten

KHali hatheliyon pe ab harf-e-dua bhi kyun khule

shiddat-e-raqs-e-arzu apna jawaz aap thi

meri nigah par 'ada' meri KHata bhi kyun khule