hisar-e-dard sa main sai-e-raegan sa main

hisār-e-dard sā maiñ sa.ī-e-rā.egāñ sā maiñ

ye sho.ala sho.ala fazā aur dhuāñ dhuāñ sā maiñ

paheliyāñ sī mire ird-gird bikhrī huiiñ

huzūr-e-vaqt koī lamha-e-girāñ sā maiñ

qadam qadam na.e unvān muñh uThā.e hue

kisī rivāyat-e-kuhna kī dāstāñ sā maiñ

kisī guzarte hue sānehe kā lamha tū

aur ek lamhe kī ḳhātir ravāñ-davāñ sā maiñ

maiñ intizār kī taqdīs tū shikast-e-vafā

tū dā.eroñ kā makīñ dard-e-lā-makāñ sā maiñ

tamām samt vahī shor meñ faqat maiñ huuñ

kahāñ ye shor kahāñ ek be-zabāñ sā maiñ

mujhe banā ke tirī aañkh khul ga.ī jaise

bikhar gayā huuñ yahāñ ḳhvāb-e-rā.egāñ sā maiñ

hazāroñ ḳhvāhisheñ lākhoñ alam mire hamrāh

ragoñ kā ashk' kahāñ jaane kārvāñ sā maiñ

hisar-e-dard sa main sai-e-raegan sa main

ye shoala shoala faza aur dhuan dhuan sa main

paheliyan si mere ird-gird bikhri huin

huzur-e-waqt koi lamha-e-giran sa main

qadam qadam nae unwan munh uThae hue

kisi riwayat-e-kuhna ki dastan sa main

kisi guzarte hue sanehe ka lamha tu

aur ek lamhe ki KHatir rawan-dawan sa main

main intizar ki taqdis tu shikast-e-wafa

tu daeron ka makin dard-e-la-makan sa main

tamam samt wahi shor mein faqat main hun

kahan ye shor kahan ek be-zaban sa main

mujhe bana ke teri aankh khul gai jaise

bikhar gaya hun yahan KHwab-e-raegan sa main

hazaron KHwahishen lakhon alam mere hamrah

ragon ka ashk' kahan jaane karwan sa main