hisar-e-hijr ke jughrafie samajh aae

hisār-e-hijr ke juġhrāfi.e samajh aa.e

jab apne duur hue marsiye samajh aa.e

maiñ vāpas aa ke batā.ūñgī un kā haal tumheñ

agar mazār pe jalte diye samajh aa.e

tumhāre ishq kī in sā.atoñ ke baa'd hameñ

musavvirī ke na.e zāviye samajh aa.e

tarāsh Dālūñgī alfāz ko ba-sūrat-e-sher

ġhazal ke jūñhī mujhe qāfiye samajh aa.e

vo likhne vaale ne likkhe the buġhz meñ jal kar

muarraḳhīn ko jo hāshiye samajh aa.e

hameñ pasand na thā mushkiloñ meñ rahnā bhī

so jitne roz jahāñ meñ jiye samajh aa.e

bahut se naqsh adhūre haiñ ab talak 'tābish'

bahut se log tumhāre liye samajh aa.e

hisar-e-hijr ke jughrafie samajh aae

jab apne dur hue marsiye samajh aae

main wapas aa ke bataungi un ka haal tumhein

agar mazar pe jalte diye samajh aae

tumhaare ishq ki in saaton ke ba'd hamein

musawwiri ke nae zawiye samajh aae

tarash Dalungi alfaz ko ba-surat-e-sher

ghazal ke junhi mujhe qafiye samajh aae

wo likhne wale ne likkhe the bughz mein jal kar

muarraKHin ko jo hashiye samajh aae

hamein pasand na tha mushkilon mein rahna bhi

so jitne roz jahan mein jiye samajh aae

bahut se naqsh adhure hain ab talak 'tabish'

bahut se log tumhaare liye samajh aae