حصار ذات سے باہر نکل کے آ تو سہی

حصار ذات سے باہر نکل کے آ تو سہی

وفا کی راہ پہ چل کر ذرا دکھا تو سہی

پھر اس کے بعد بھٹک جاؤں تو قصور مرا

اسیر شب ہوں مجھے روشنی میں لا تو سہی

میں مطمئن ہوں دکھوں سے خوشی ملی نہ ملی

تری جناب سے صد شکر کچھ ملا تو سہی

خرد تو بیٹھی رہی حسن کی امیدوں پر

جنوں نے دشت نوردی کی کچھ کیا تو سہی

میں منتشر ہی رہا خواہشوں کے صحرا میں

مرا وجود مکمل تھا کب بتا تو سہی

مذاق سمجھا ہے الفت کو تو نے اے شارقؔ

دو ایک سنگ مری طرح سر پہ کھا تو سہی