ہو اگر میرے یار آ جاؤ

ہو اگر میرے یار آ جاؤ

ہے مجھے انتظار آ جاؤ

میں بھی ہوں بیقرار آ جاؤ

تم بھی ہو دل فگار آ جاؤ

ہو کے دوش صبا پہ آج سوار

گر نہ ہو ناگوار آ جاؤ

میں ہوں دیوانہ وار تم پہ فدا

ہو اگر اعتبار آ جاؤ

میں ہوں اس پار اور تم اس پار

توڑ کر یہ حصار آ جاؤ

ہے تمہاری شکست میری شکست

مان لوں گا میں ہار آ جاؤ

میں تمہاری کروں گا دل جوئی

تم ہو کیوں اشک بار آ جاؤ

آج برقیؔ ہے گوش بر آواز

تم بجاتے ستار آ جاؤ