ho buzdili ka bahana to sabr kya TuTe

ho buzdilī kā bahānā to sabr kyā TuuTe

agar hai zabt to ab is kī intihā TuuTe

na.e charāġh jaleñ dhuñdh kī ridā TuuTe

ye mere ḳhvāb the lekin ye bārhā TuuTe

merī talab meñ kamī hai na hausloñ meñ magar

ye hasratoñ kī tamannā hai dil mirā TuuTe

hai be-ruḳhī bhī terī kuchh to āñdhiyoñ kī tarah

charāġh-e-dil kī mire jis meñ iltijā TuuTe

ḳhatā bhale na ho dushyant kī magar phir bhī

yahāñ vo riit hai jis meñ shakuntlā TuuTe

yahāñ pe dair-o-haram ke haiñ mas.ale saaqī

ḳhudā vo din na dikhā.e ki mai-kadā TuuTe

zamīr bech ke jiine se maut hai achchhī

na sach dikhā.e to behtar hai ā.īna TuuTe

ye mushkilāt bhī uktā ga.iiñ haiñ ab mujh se

ho āsmāñ bhī to vo kitnī martaba TuuTe

zabāñ vo kaise bhalā ghuñghruoñ kī samjhegā

ki jis ke sāmne chūḌī kī iltijā TuuTe

tirī ḳhushī ke liye dil tujhe maiñ de duuñ magar

jo chuur chuur hai āḳhir vo aur kyā TuuTe

milegī 'rāz' amīroñ ko kab talak shohrat

maiñ chāhtā huuñ ki ab ye paramparā TuuTe

ho buzdili ka bahana to sabr kya TuTe

agar hai zabt to ab is ki intiha TuTe

nae charagh jalen dhundh ki rida TuTe

ye mere KHwab the lekin ye barha TuTe

meri talab mein kami hai na hauslon mein magar

ye hasraton ki tamanna hai dil mera TuTe

hai be-ruKHi bhi teri kuchh to aandhiyon ki tarah

charagh-e-dil ki mere jis mein iltija TuTe

KHata bhale na ho dushyant ki magar phir bhi

yahan wo rit hai jis mein shakuntla TuTe

yahan pe dair-o-haram ke hain masale saqi

KHuda wo din na dikhae ki mai-kada TuTe

zamir bech ke jine se maut hai achchhi

na sach dikhae to behtar hai aaina TuTe

ye mushkilat bhi ukta gain hain ab mujh se

ho aasman bhi to wo kitni martaba TuTe

zaban wo kaise bhala ghunghruon ki samjhega

ki jis ke samne chuDi ki iltija TuTe

teri KHushi ke liye dil tujhe main de dun magar

jo chur chur hai aaKHir wo aur kya TuTe

milegi 'raaz' amiron ko kab talak shohrat

main chahta hun ki ab ye parampara TuTe